قصيدة زملكاوية على لحن مونولوج إسماعيل يس "عايز أروح ماتروحشى"

(هذه الأغنية من أول الأغانى اللى ألفتها ع الزمالك، وهى مناسبة جدا لأى خسارة للزمالك سواء من الأهلى أو أى فريق تانى .. ممكن تعتبر كنشيد زملكاوي يردده نادى الزمالك مع جمهوره)

القرار:
(الزمالك) عايز أروح
(جمهور الزمالك) ماتروحشى
(الزمالك) لأ أنا مروح
(جمهور الزمالك) ماتروحشى
(الزمالك) طب أنا مروح

1)الزمالك
ده الأهلى لما بيلاعبنى ... دورى سوبر أو حتى كاس
بنتيجة كبيرة بيغلبنى ... وبقيت مع جماهيرى محتاس
كسب بحظ ولا بحكام؟ ... يمكن مسنود من الإعلام
أصله فى الكل بيطوح ... أصله فى الكل بيطوح

2) جمهور الزمالك
حسرة علينا يا حسرة علينا ... الأهلوية مارحموناش
لعب الكورة مابقاش لينا ... كلامنا فيه كله بكاش
شجعنا الزمالك ليه؟ ... عملنا بتشجيعه إيه؟
أصل الأهلى ما بيرحمشى ... أصل الأهلى ما بيرحمشى

3) الزمالك
لو هاستنى هنا هاتوفى ... م الحقن اللى باخدها فى جونى
كل موسم دمى بيتصفى ... والأهلى يزود لى جنونى
فاكرين الستة يا عينى ع الستة ... اجوان كتير من كل حتة
كل ماتش لازم أتسوح ... عشان كده أنا عايز أروح

4) جمهور الزمالك
فين الدورى فين الكاس ... فين البطولة الأفريقية
مفضوحين قدام الناس ... أصل إحنا خيبتنا قوية
يا منجى من المهالك ... خد بإيد نادى الزمالك
ماتسيبناش يا نادينا وتمشى ... حالنا بقى أنيل م المحشى

مقدمة

أهلا وسهلا إلى كل زائر لهذه المدونة الفريدة من نوعها .. مدونة ضد ما هو زملكاوي!!!

بداية صاحب هذه المدونة لا يكره الزمالك ولا الزملكاوية ولكنه مثل الكثير من الأهلاوية بجد البسمة فى كل ما هو زملكاوي ويضحك عليها ليس من باب الحقد والكيد ولكن من باب الإستمتاع بالكوميديا الزملكاوية السوداء.

هذه المدونة ليست مجرد للتريقة والمسخرة على الزمالك و الزملكاوية، فالهدف هو إثبات أن تشجيع نادى الزمالك هو مشروع فاشل يخسر فيه أى زملكاوي أكثر مما يكسبه. والموضوع كله هو مشاكسة كروية ليست أكثر ولا أقل، طالما لا يوجد سباب أو إهانات شخصية موجهة لأى أحد.

إلى كل أهلاوي أسعده حظه الجيد يدخل هذه المدونة .. إستمتع بكل ما لذ وطاب من الكوميديا الزملكاوية
وإلى كل زملكاوى شاء حظه العاثر أن يدخل هذه المدونة .. أدعو لك أن يتغمدك ربك بالرحمة مقدما لأنك لن تتحمل أن تكون مشجعا للزمالك منذ لحظة دخولة لهذه المدونة