أغنية من زملكاوى إلى هنرى ميشيل: "إبن الأرندلى" (للمدون مايكل محسن)

(الأغنية دي إهداء لمدرب الزمالك الفاشل الهارب هنري ميشيل على لسان حال الجمهور الزملكاوي المأسوف على حاله)

لئييييييييم..ليه بتكتلي
يا قديييييييييم يا ابن الأرندلي
خمورجي لعبي وماشي بdrink
ولا عمره جاب لى بطولة من تلك
عامل حنين ومسهوك
وجاي ملهوف متلهوج
الوش ده بقى..لأ يا حبيبي بقي
ما ببلعوش ما ببلعوش
ما ببلعوش وأنت جايلي
يلا يا ابن الأرندلي

جاي تشتغلني بتستغفلني
ولا أنت جاي بتستهبلني
شوف يا ضنايا .. نادي القضايا
وحتبقى منهم لو تخذلني
والنعمة لو بإيه حلفتلي
ليه..ليه بتكتلي؟ اه يا قدييييييم..يا ابن الأرندلي
موطي صوتك ليه ياfrench؟
تعبان يا ناس وبكنز قرش
الغلب من مين يتعلم
واللعب يتعب ويغلب
عاوزلي فيها قال ميسي وكاكا قال
قولوله ماشي قولوله ماشي
قولوله ماشي..ده اللي جري جري
(ألف سبعة ألف) يا ابن الأرندلي

خمورجي لعبي وماشي بdrink
ولا عمره جاب لى بطولة من تلك
عامل حنين ومسهوك
وجاي ملهوف متلهوج
الوش ده بقى..لأ يا حبيبي بقي
ما ببلعوش ما ببلعوش
ما ببلعوش وأنت جايلي
(ألف سبعة ألف) يا ابن الأرندلي

 مصدر الأغنية من هذه التدوينة:
http://strugglingmichealitoo.blogspot.com/2009/12/11.html

شعر أهلاوى عن الزمالك "عجبي على بت بيضة"

(منقول من شعر كتبه أهلاوي مجهول عن حال الزمالك الواقع طول الوقت)

عجبي على بت بيضة وشعرها زي الحرير

كانت لما بتنزل الحارة عقل الشباب بيطير

بس بختها مال بسبب شوية حمير

مجلس ادارة تعبان وشوية لاعيبه طراطير

أسمها بقى عادي ولا مركز شباب أبو المطامير

المسكينة راحت هيبتها ونامت عيانه في السرير

نفسي يتصلح حالها وتطلع بقى من البير

ياللي مبهدلنها احسنلكم روحوا سوقوا حناطير

ويا لعيبه مكانكم سوق الفجل والجرجير

انا صحيح أهلاوي بس صعبان عليا البت دي كتير

نفسي ترجع زي زمان ويعملها حساب الصغير والكبير

يافريق الزمالك يا جايب المهالك لجمهورك العظيم (منقول بتصرف)

(منقول من شعر كتبه شاعر إسمه محمد عبد العليم ومعدل فيها، يخاطب فيها الزملكاوي ناديه بكل جوارحه ولكن بطبيعة الحال لا حياة لمن تنادى)

يا فريق الزمالك يا جايب المهالك
لجمهورك العظيم
لا نافع مدرب ولا لاعب مشطب
مكسح مكحكح سقيم
يخبط ويضرب زمايله في ملعب
شيطان ورجيم
يقولك فلوسي وبعالج ضروسي
من سوسي الغريم
يتكلم ويحور بين عقده المزور
وعقده السليم
وكل ماتش يهرب خايف يتعب
مع باقى التيم

يتعمد الهزيمة بعادته اللئيمة
بلعبة قديمة مالهاش أي قيمة

في كل ماتش هي اللعبة منتهية
با متعادل يا مهزوم
ومكافأة للمكسح والمكحكح والمتنح
والعايش في النوم

والخيبه للى شجع فريق لازم يتقطع
يتبعزق زي البرسيم
يا تشوفوا حل بكرة لفريق ولاعيبة نكرة

ماتسواش ولا مليم
يا نترحم على فريق أصبح تحفة وعتيق
بتاريخه القديم

الموال الحزين الدراماتيكى الهستيرى "أنا زملكاوى"

(هذه الأغنية مرتبطة بهزائم الزمالك عامة والهزيمة من بنى عبيد بشكل خاص، يرددها الزملكاوي عندما يكون قد عاد لوعيه ورشده وقرر أن يقوم بالخطوة الصحيحة ولو لمرة واحدة فى حياته البائسة )

أنا زملكاوى والزمالك عندى ... دم بيجرى فى الوريد
لكن بعد اللى حصل له ... لازم يكون فيه تجديد

عاملين لى ملوك الكورة ... وهما فرقة فى الحضيض
قال كل مرة نخسر ... هانرجع من تانى فرقة حديد

أهو غسلونا فى الملعب ... ونزلوا فينا تنفيض
وعملوا علينا حفلة ... كان فيها الضرب شديد

أنا من دلوقتى هاغير ... طالما الزمالك مافيهوش جديد
وإن قالوا جاسوس أو خاين ... مش خايف من التهديد

من حقى أفرح وأنبسط ... بدل ما أموت من الحزن شهيد
ويكتبوا على شاهد قبرى ... زملكاوي مات ليلة العيد

سامحونى يا أهلى وناسى ... غلطت فى حقكم أكيد
إيدكم معايا يا زملكاوية ... نروح نشجع بنى عبيد

أو حتى نشجع الأهلى ... من غير ما الواحد يبقى عنيد
ده الأهلى فرقة تشرف ... فرقة أصلية مش تقليد

ليالي الزملكاوية (مستوحاة من تتر ليالي الحلمية للمدون مايكل محسن)

(الأغنية بتحكي عن الواقع المؤلم اللي بيمر به نادي الزمالك من شغل شلل بين اللاعيبة وأحكام القضاء والصراعات الشخصية بين الإدارات اللي وصلت النادي لهذا الحال ..)

ومنين بيجي الألم..من العيال الرمم
ومنين بيجي القفا..من اللعب جوه الدفا
ومنين بيجي السواد..من لاعيبة بهوات
ومنين بيجي الوبا..من محاكم القضا

من إنكسار الروح لشغل الشلل .. يجي انهيار النادي في حالة عفن
واللي يقولك لازم يأخذ التار.. واللى يقولك مش فارقة أى إستهتار
يقعد جمهور محتار مليان شجن

ومنين بيجي الألم..من العيال الرمم
ومنين بيجي القفا..من اللعب جوه الدفا
ومنين بيجي السواد..من لاعيبة بهوات
ومنين بيجي الوبا..من محاكم القضا

ليه يا زمالك مسبتناش أبرياء وواخدنا ليه في طريق جواه بنتوه
في استاد بلدنا حتبدأ السخرية..ومش عاتقنا السيد المندوووه

حنروح نشجع في مين
دول لاعيبة تعبانين
حنروح نشجع في مين
في العيال الكتيانين

قاعدين نشوف في خيبتنا ما احنا اتنسينا
يجيبولنا يعنى مين تانى يبهدل فينا
ولسه يا اما أيامنا فيها دايما مساخر
وبكره تلاقى كله بيضحك علييينا

حنروح نشجع في مين
دول لاعيبة تعبانين
حنروح نشجع في مين
في العيال الكتيانين

 مصدر الأغنية من هذه التدوينة:
http://strugglingmichealitoo.blogspot.com/2009/03/blog-post.html

قصيدة "يوميات زملكاوي مفروس متعوس منحوس ملبوس"

سرت حائرا بين الدروب وسلكت شتى المسالك
فلم أجد فريقا أشجعه أسوأ من فريق الزمالك

فريقا أصابه الوهن فهوى فى سحيق المهالك
يزداد سوءا كل يوم فى نفق الظلام الحالك

فإن إداراته فاشلة و مدربوه أفشل وجمهوره كذلك
ناهيك عن المشاكل والفضائح والكوارث والمعارك

لاعبوه يتحركون فى كسل بأقدام ثقيلة كالسبائك
يرون الخصم يصول ويجول وليس منهم مشارك

وحارس يخشى لمس الكرة كأنها مغلفة بسلك شائك
يتابعها بدهشة تسكن مرماه وإذ هو بالهواء ماسك

ومهما تغيرت أحوال الفريق يظل كالعادة متهالك
فلا تلومن إلا نفسك يا من كفرت بتشجيع الزمالك

مقدمة

أهلا وسهلا إلى كل زائر لهذه المدونة الفريدة من نوعها .. مدونة ضد ما هو زملكاوي!!!

بداية صاحب هذه المدونة لا يكره الزمالك ولا الزملكاوية ولكنه مثل الكثير من الأهلاوية بجد البسمة فى كل ما هو زملكاوي ويضحك عليها ليس من باب الحقد والكيد ولكن من باب الإستمتاع بالكوميديا الزملكاوية السوداء.

هذه المدونة ليست مجرد للتريقة والمسخرة على الزمالك و الزملكاوية، فالهدف هو إثبات أن تشجيع نادى الزمالك هو مشروع فاشل يخسر فيه أى زملكاوي أكثر مما يكسبه. والموضوع كله هو مشاكسة كروية ليست أكثر ولا أقل، طالما لا يوجد سباب أو إهانات شخصية موجهة لأى أحد.

إلى كل أهلاوي أسعده حظه الجيد يدخل هذه المدونة .. إستمتع بكل ما لذ وطاب من الكوميديا الزملكاوية
وإلى كل زملكاوى شاء حظه العاثر أن يدخل هذه المدونة .. أدعو لك أن يتغمدك ربك بالرحمة مقدما لأنك لن تتحمل أن تكون مشجعا للزمالك منذ لحظة دخولة لهذه المدونة