أميروز .. أنتى زمالكوز: لكل الزملكاوية قبل كل الأهلاوية .. كل ستة وانتوا طيبين

كل ستة وانتوا طيبين جميعا

النهاردة تمر الذكرى الثامنة على المباراة التاريخية يوم 16\5\2002 .. مباراة فوز الأهلى الخرافى ستة واحد على الزمالك

مباراة إستثنائية مهما عدت عليها السنين لسه ليها علامة مع الأهلاوية والزملكاوية على حد سواء
لكن اللى كان يميز المباراة دى مش مجرد نتيجتها الكبيرة التاريخية لكن حاجات تانية كتير زي:

- المباراة لعبت بعد وفاة المايسترو صالح سليم ب10 ايام وطبعا الوفاة دى كان ليها تأثير على نادى الأهلى وجماهيره، ولو كان الأهلى إتعادل أو خسر المباراة دى كان يبقى معذور، خصوصا إن الزمالك رغم إنه كان لسه خسران من الإسماعيلي 4-3 بس كان مستواه أعلى نسبيا وقتها من الأهلى.

- دى كانت تانى مباراة قمة يواجه فيها مانويل جوزيه مدرب الأهلى الأسطورى الزمالك، وبفضل المباراة دى دخل جوزيه قلوب كل الأهلاوية وتاريخ الأهلى من أوسع أبوابه

- المباراة دى شهدت أول مرة لاعب يسجل فى لقاءات القمة سوبر هاتريك وهو المتألق وقتها خالد بيبو أو خالد الأمين اللى جماهير الأهلى أطلقت عليه بيبو تيمنا بإسم الخطيب

- مباراة الستة واحد شهدت تسجيل أول هدف فى تاريخ مباريات القمة بالصدر من اللاعب ابراهيم سعيد

...وغيرها من مميزات ماتش الستة

طب وعلى إيه أقعد أعدد أنا فى إحصائيات مباراة الستة؟ ما تيجوا نسمع تحليل المباراة من أحسن واحد بيفهم كورة فى مصر

لأ مش إنت يا عم سيد أبو حفيظة!!!
أنا قصدى علاء صادق اللى حتى لو بيؤخذ عليه أخطاء
شخصية لكن هو ماكانش فيه غيره ع الساحة وقتها من قبل حتى شوبير

مش محتاج إنى أجيب أهداف الأهلى أو ملخص الماتش ده أو حتى أحط ريميكساته بتاعة مدحت شلبى (اللى كان محبوب من الأهلاوية وقتها) لكن هاكتفى بردود الفعل الجماهير عليه بعد الماتش على طول

ده فيديو خروج جماهير الزمالك بعد الهدف الخامس

وده لقاء مع مشجعين زملكاوية بعد الماتش خارج الإستاد (من ضمنهم "أبو بيجامة" أسامة خليل والخواجة أشهر مشجعى الزمالك)ا

ممكن حد من الزملكاوية يقول لى يا عم بخة .. قصدى يا عم اميروز .. لازمته إيه تقليب المواجع؟ بعدين ده ماتش عدت عليه سنين طويلة وأكيد مالهاش تأثير على الناس دلوقتى زي زمان
أقول لهم بالعكس بقى .. تأثير المباراة دى باقية عليكم أكتر مننا! والدليل فى الفيديو ده لما حازم إمام بعد كذا سنة إتسأل عن أكتر ماتش زعل وعيط فيه